#വികലമാകരുത്_വിദ്യാഭ്യാസ_നയം. 

 ഇന്ത്യയിലെ വിദ്യാഭ്യാസ രംഗത്ത് മൂന്നര പതിറ്റാണ്ടിനുശേഷം നിലവില്‍ വന്ന വിദ്യാഭ്യാസ നയമാണ് ഇന്ന് ചര്‍ച്ചയാകുന്നത്. രാജ്യത്തെ വിദ്യാഭ്യാസ സമ്പ്രദായത്തില്‍ കാതലായ മാറ്റങ്ങള്‍ അനിവാര്യമാണ് കാരണം സാമൂഹ്യമാറ്റങ്ങൾക്ക് അനുസൃതമായി വിദ്യാഭ്യാസ നയവും മാറേണ്ടതുണ്ട്.  1834  മെക്കാളെ പ്രഭു കൊണ്ടുവന്ന താഴെ തട്ടിലേക്കുള്ള അരിച്ചിറങ്ങൽ ( Downword Filtration Theory) യും ഇന്ത്യന്‍ വിദ്യഭ്യാസ മാഗ്നാകാർട്ട എന്ന് വിശേഷിപ്പിക്കപ്പെട്ട 1854 ലെ വുഡ്സ് ഡെസ്പാച്ചും വിദ്യാഭ്യാസ രംഗത്ത്  കൊണ്ടുവന്ന മാറ്റങ്ങൾ പ്രസക്തമാണ്. സ്വാതന്ത്ര്യാനന്തരം നിലവിൽ വന്ന രാധാകൃഷ്ണന്‍ കമ്മീഷനും, മുതലിയാര്‍ കമ്മീഷനും, കോത്താരി കമ്മീഷനും വിദ്യാഭ്യാസ രംഗത്തെ നെടുംതൂണുകൾ എന്ന് പറയേണ്ടി വരും.  1986 ലെ നവീന വിദ്യാഭ്യാസ നയം ( New Education Policy) നിലവില്‍ വന്നപ്പോഴും നിലവിലുള്ള വിദ്യാഭ്യാസ സമ്പ്രദായത്തെ കൂടുതല്‍ കാര്യക്ഷമമാക്കുകയും വിദൂര വിദ്യാഭ്യാസത്തിനും പ്രാഥമിക വിദ്യാഭ്യാസത്തിനും കാതലായ മാറ്റങ്ങള്‍ കൊണ്ടുവരുകയും ചെയ്തു.

          മൂന്നര പതിറ്റാണ്ടിനുശേഷം ഭാരതത്തിലെ വിദ്യാഭ്യാസ രംഗത്ത് ദിശബോധം നൽകുമെന്ന് പറയപ്പെടുന്ന ഡോ. കസ്തൂരിരംഗൻ്റെ നേതൃത്വത്തിലുള്ള സമിതി റിപ്പോര്‍ട്ടുകളിലെ ചില നിര്‍ദേശങ്ങള്‍ സ്വാഗതാർഹവും ചിലത് തികഞ്ഞ  ഇതികർത്തവൃതാമൂഢത്വാവസ്ഥയിലുള്ളതാണ് .ഇത്തരത്തിലുള്ള പിഴവുകള്‍ വസ്തുതാപരമായി സൂചിപ്പിക്കുവാൻ ഞാന്‍ ആഗ്രഹിക്കുന്നു.

1. 2030 ന് ശേഷം നിലവിലുള്ള ബി. എഡ് കോഴ്സ് അപ്രസക്തമായി മാറുകയും , പിന്നീടുള്ള അധ്യാപക നിയമനത്തിനുള്ള അടിസ്ഥാന യോഗ്യത ഇൻ്റഗ്രേറ്റഡ് ബി. എഡ് ആയി നിശ്ചയിക്കുന്നു.

നിലവില്‍ രണ്ട് വര്‍ഷ ബി.എഡ് പഠിച്ചവരും പഠിക്കുന്നവർക്കും 2030 ന് ശേഷം ഭ്രഷ്ട് കല്പിക്കുന്നത് എന്തിനാണ് ?  

നിലവിലെ രണ്ട് വര്‍ഷ ബി.എഡ്  വിദ്യാർത്ഥികളോട് കോഴ്സ് തുടരാന്‍ ആവശ്യപ്പെടുന്നത് അവരെ വഞ്ചിക്കുന്നതിന് തുല്യമല്ലേ ?

നിലവില്‍ സാങ്കേതിക വിദ്യയിലധിഷ്ഠിതമായി ബി. എഡ് ചെയ്തവർക്ക് 2030 ശേഷം വിലക്ക് വെയ്ക്കുന്നത് എന്ത് അടിസ്ഥാനത്തിലാണ് , കേന്ദ്ര - സംസ്ഥാന സര്‍ക്കാര്‍ മാനദണ്ഡം പാലിച്ച് പഠിച്ചതാണോ തെറ്റ് ? 

രാജ്യത്ത് തൊഴിലില്ലായ്മ കുത്തനെ വർദ്ധിക്കുമ്പോൾ, സംസ്ഥാനത്ത് നിയമന നിരോധനാവസ്ഥയിൽ നിലനില്‍ക്കുമ്പോൾ എങ്ങനെ ഇനിയുള്ള 9 വർഷത്തിനുള്ളിൽ അധ്യാപക ജോലിയില്‍ പ്രവേശിക്കാനാകും ?  

2.ആറാം ക്ലാസ് മുതല്‍ തൊഴിലധിഷ്ഠിത വിദ്യാഭ്യാസത്തിനൊപ്പം ഇൻ്റേൺഷിപ്പും നടപ്പാക്കുമെന്നാണ് നയം വ്യക്തമാക്കുന്നത്. അതിനായി നൽകിയിരിക്കുന്ന തൊഴിലുകള്‍ മരപ്പണി, കരകൗശല നിർമ്മാണം, മൺപാത്ര നിർമ്മാണം എന്നിവയ്ക്കൊപ്പം വ്യാപാരികള്‍ക്കൊപ്പം ഇൻ്റേൺഷിപ്പും ആണ് പറയുന്നത്. ആർട്ടിക്കിൾ 24 നിലനില്‍ക്കുന്ന ഒരു രാജ്യത്താണ് ഇങ്ങനെ ഒരു ഇന്റേൺഷിപ്പിനുള്ള ശുപാര്‍ശ എന്നതും ആശ്ചര്യപ്പെടുത്തുന്നു. കാലത്തിന് അനുസരിച്ചുള്ള മാറ്റം ഉൾക്കൊള്ളുന്നതാണോ ഈ തൊഴിലുകൾ?

3. 15 വർഷം കൊണ്ട് എല്ലാ കോളേജുകൾക്കും സ്വയംഭരണാധികാരം ലഭിക്കുമെന്ന് പറയുന്നുണ്ടെങ്കിലും അതിന്റെ അടിസ്ഥാനം എന്താണ്?

സർവകലാശാലകൾ കാഴ്ചക്കാരൻ്റെ റോളിലേക്ക് മാറുമ്പോൾ കോളേജുകളുടെ നിയന്ത്രണം ആരുടെ കൈകളിലാണ് നിക്ഷിപ്തമാകുന്നത്?.

4. രാജ്യാന്തര സർവ്വകലാശാലകളുടെ പ്രവര്‍ത്തനം ഇന്ത്യയില്‍ എങ്ങനെ  സാധ്യമാക്കും ?

അതിനുള്ള ഗുണപരമായ സമീപനങ്ങള്‍ എന്തെല്ലാമാണ് ?.

5.. നാല് വര്‍ഷ ഇൻ്റഗ്രേറ്റഡ് ഡിഗ്രി കോഴ്സിൽ ബി. എഡ് പരിശീലനം എങ്ങനെ നടപ്പാക്കും? സിദ്ധാന്തങ്ങളിലൂടെയുള്ള അധ്യാപക പരിശീലന പഠനമാണോ, അതോ പരിശീലനത്തിലൂടെയുള്ള പഠനത്തിനാണോ പ്രാമുഖ്യം നല്‍കുന്നത് ?

പരിശീലനം ഇല്ലാത്ത ബി.എഡ് വരും തലമുറയെ നിശ്ചലാവസ്ഥയിലാക്കും.

        വിദ്യാഭ്യാസ നയങ്ങൾ കാലോചിതമായി പരിഷ്കാരിക്കുന്നതിനും പാഠ്യപദ്ധതിയിലും പഠനരീതിയിലും മാറ്റം ഉണ്ടാക്കാന്‍ കഴിയുന്നതാകണം വിദ്യാഭ്യാസ നയം.  484 പേജുള്ള ഡോ. കസ്തൂരിരംഗൻ്റെ പുത്തൻ വിദ്യാഭ്യാസ നയ റിപ്പോര്‍ട്ട് 64 പേജായി ചുരുങ്ങിയെന്നതും പ്രസക്തമാണ്. 

" ഒരു മനുഷ്യനിലുള്ള സമഗ്രമായ കഴിവുകളുടെ - ശാരീരിക - മാനസിക - ആദ്ധ്യാത്മിക - പൂർണ്ണതയുടെ വികസനവുമാണ് വിദ്യാഭ്യാസമെന്നതു കൊണ്ട് അർത്ഥമാക്കുന്നത് " എന്ന രാഷ്ട്രപിതാവിൻ്റെ വാക്കുകള്‍ അർത്ഥപൂർണ്ണമാക്കുന്നതാകണം നമ്മുടെ വിദ്യാഭ്യാസ നയം. അതിനുള്ള ശേഷി ഇന്നത്തെ വിദ്യാഭ്യാസ നയത്തിന് ഉണ്ടോ എന്ന് പൊതുസമൂഹം പരിശോധിക്കട്ടെ  അതിന് ശേഷം നടപ്പിലാക്കാം. പുതിയ വിദ്യാഭ്യാസ നയത്തെ കുറിച്ചുള്ള ചർച്ചകളും മാറ്റങ്ങളും നമ്മുടെ സമൂഹത്തിന് തന്നെ ഗുണപരമാകും.

        #NEP2020

           🖋 അതുൽ കമുകുംചേരി.